მთავრობის ადმინისტრაციასთან სვანეთში ჰესების მშენებლობის მოწინააღმდეგეთა საპროტესტო აქცია გაიმართა

საქართველოს მთავრობის ადმინისტრაციასთან სვანეთში ჰესების მშენებლობის მოწინააღმდეგეთა საპროტესტო აქცია გაიმართა. მათი განცხადებით, დაუშვებელია სვანეთში მოხდეს ისეთი პროექტების განხორციელება, რომლებიც ბუნებას აყენებს ზიანს.

„ეს პრობლემა თავისთავად მხოლოდ სვანეთს არ აწუხებს, ამიტომ დღევანდელ აქციაზე ვუერთდებით ჩვენ საქართველოში უგუნური პროექტების განხორციელების წინააღმდეგ აქციებს, რომელიც გვართმევს ჩვენს ძვირად ღირებულ ბუნებას. ვითხოვთ, რომ კიდევ ერთხელ გავიაროთ საკითხი ჩვენს მიერ მოწვეულ სპეციალისტებთან და მათ სპეციალისტებთან ერთად. ასევე პროცესში ჩაერთონ სახელმწიფო ინსტიტუციები. არ შეიძლება ხელაღებით მშენებლობის დამტკიცება. თითქმის ყველა ჰესი, რომელიც აშენდა, ან დაინგრა, ან ექსპლუატაციაში ვერ შევიდა ბოლომდე, რაც მეტყველებს, რომ გარკვეული პრობლემებია. ჩვენ მოვითხოვთ, რომ განხილვის შემდეგ თუ დადგინდება, რომ მშენებლობა გასაჩერებელია, უნდა შეჩერდეს“, –განაცხადა აქციის ერთ–ერთმა მონაწილემ დავით გულბანმა.

ამასთან, აქციის მონაწილეების თქმით, 7 აპრილს, ონში ჰესების მშენებლობის მოწინააღმდეგეების მიერ მორიგი საპროტესტო აქცია გაიმართება.