ზვიად დევდარიანი აუცილებლად გამოიკითხება და ეს გახდება საზოგადოებისთვის ცნობილი, - ამის შესახებ შინაგან საქმეთა მინისტრის მოადგილემ ნათია მეზვრიშვილმა განაცხადა.
როგორც ნათია მეზვრიშვილმა აღნიშნა, დაკითხვის სურვილი თავად დევდარიანმაც გამოხატა.
ამავე დროს, ნათია მეზვრიშვილი მოუწოდებს შესაძლო მსხვერპლებს, არასამთავრობო ორგანიზაციებს, ჟურნალისტებს, ვისაც აქვთ ინფორმაცია, ითანამშრომლონ გამოძიებასთან.
„დავიწყეთ გამოძიება. მოვუწოდეთ ყველას, მათ შორის მსხვერპლებს, არასამთავრობო ორგანიზაციებს და ჟურნალისტებსაც, რომ მოგვაწოდონ ინფორმაცია, მოუწოდონ მსხვერპლებს, რომ ითანამშრომლონ გამოძიებასთან. სხვაგვარად, ჩვენ გაგვიჭირდება ამ ადამიანების ვინაობების დადგენა“, - განაცხადა ნათია მეზვრიშვილმა.
„სიდას“ ყოფილი აღმასრულებელი დირექტორის ზვიად დევდარიანის მხრიდან სექსუალურ შევიწროებასთან დაკავშირებით საჯაროდ გამოთქმულ ბრალდებებზე შინაგან საქმეთა სამინისტრომ გამოძიება დაიწყო. თავად დევდარიანი აცხადებს, რომ მის მიმართ წაყენებული ბრალდებები სიცრუეა, რის გასაქარწყლებლადაც ის სამართლებრივი ბრძოლის დაწყებას აპირებს.