ქობულეთში, სოფელ ხუცუბანიდან გურიაში ხის გადატანისას "ერთიანი ნაციონალური მოძრაობის" წევრები სოლომონ ბაჯელიძე და რეზო ხარაზი დააკავეს, - ამის შესახებ "ინტერპრესნიუსს" "ერთიანი ნაციონალური მოძრაობის" ქობულეთის საკრებულოს დეპუტატმა ბონდო თედორაძემ განუცხადა.

მისი თქმით, სოლომონ ბაჯელიძე და რეზო ხარაზი ხის გადატანის გამო, კომპანიისგან შესაბამის დოკუმენტებს ითხოვდნენ. ბონდო თედორაძის ინფორმაციით, სამარალდამცავებსა და "ერთიანი ნაციონალური მოძრაობის" წევრებს შორის დაპირისპირება მოხდა.

"დაკავებულია სოლომონ ბაჯელიძე და რეზო ხარაზი, ჩვენ ხის გადატანას ვაპროტესტებდით. ხის ტრანსპორტირებისას დროებითი ნაგებობები და ხეები დააზიანეს. სამართალდამცავებმა ჩვენზე ძალა გამოიყენეს. ხის ტრანსპორტირებას სოფელ ხუცუბანში მაინც ახორციელებენ. ვითხოვდით შესაბამის დოკუმენტაციას, რომელიც არ გააჩნდათ", - განაცხადა ბონდო თედორაძემ.

საქართველოს შინაგან საქმეთა სამინისტროს ინფორმაციით, "სისხლის სამართლის კოდექსის" 173-ე მუხლის საფუძველზე ორი პირი დააკავეს. უწყების ცნობით, მუხლის მიხედვით, აღნიშნული პირები სამართალდამცავების კანონიერ მოთხოვნას არ დაემორჩილნენ და წინააღმდეგობა გაუწიეს.