მოსკოვი დაინტერესებულია რუსეთისა და აშშ-ს პრეზიდენტებს შორის შეხვედრის გამართვაში და ძალისხმევას გამოიყენებს, რათა ამერიკელი კოლეგები ამაში დაარწმუნოს, - ამის შესახებ რუსეთის საგარეო საქმეთა მინისტრის მოადგილემ სერგეი რიაბკოვმა განაცხადა.
„ეჭვგარეშეა ის, რომ რუსული მხარე დაინტერესებულია ორი ქვეყნის ლიდერს შორის შეხვედრა შედგეს. ჩვენ ძალისხმევას გამოვიყენებთ, რათა ამერიკელი კოლეგები ამგვარ დასკვნამდე მივიდნენ. აშკარაა, რომ შეხვედრა საჭიროა“, - განაცხადა სერგეი რიაბკოვმა.
რუსეთის საგარეო საქმეთა მინისტრის მოადგილემ აღნიშნა, რომ სერგეი ლავროვსა და მაიკლ პომპეოს შორის კონტაქტის საკითხი მას შემდეგ იქნება აქტუალური, რაც მაიკლ პომპეოს კანდიდატურა სახელმწიფო მდივნის პოსტზე იქნება დამტკიცებული.
„მოსკოვსა და ვაშინგტონს შორის პირველი პირების დიალოგს ყოველთვის განსაკუთრებული მნიშვნელობა აქვს. ამას პირდაპირი გავლენა აქვს მსოფლიოში არსებულ ვითარებაზე. ამიტომაც, რუსული მხარე დაინტერესებულია ამ ინიციატივის განხორციელებაში“, - დასძინა მან.