ექსპერტი ლადო პაპავა ბიძინა ივანიშვილს ურჩევს, „ქართული ოცნების“ პარტიის თავმჯდომარეობა ჩიბაროს და არ იყაროს კენჭი პრეზიდენტის პოსტზე, - ამის შესახებ „პალიტრანიუსის“ გადაცემა „360 გრადუსში“ ექსპერტმა, აკადემიკოსმა ლადო პაპავამ განაცხადა.

„ის, რომ „ქართულმა ოცნებამ“ ბატონი ბიძინა ივანიშვილი პრეზიდენტობის კანდიდატად შეარჩიოს, არის სერიოზული მახე ბატონი ბიძინასთვის და თვითონ „ქართული ოცნებისთვის“. ახლა მას აქვს, ასე ვთქვათ, ის ტვირთი, რომ არაოფიციალურად მართავს ქვეყანას და თუ გახდა პრეზიდენტი, მერე ექნება ტვირთი, რომ არაკანონიერად მართავს. პრეზიდენტს არ აქვს მართვის უფლება. ამიტომ, სჯობს თუ ის ჩაიბარებს პარტიის თავმჯდომარეობას, გახდება პარტიის ხელმძღვანელი. როგორც ძალიან ბევრ ცივილიზებულ ქვეყანაშია, როდესაც პარტიის თავმჯდომარეები არ არიან სახელმწიფო თანამდებობის პირები, მაგრამ პარტიის ინტერესებიდან გამომდინარე, თავიანთ გუნდს მართავენ, პარლამენტშიც და მთავრობაშიც“, - განაცხადა პაპავამ.