მინდელის შახტის ტრანსპორტის უბნის უფროსი - უბედური შემთხვევა, სავარაუდოდ, ქანების ჩამოშლამ გამოიწვია

ტყიბულის მინდელის შახტაში უბედური შემთხვევა სავარაუდოდ, სამთო დარტყმამ გამოიწვია. როგორც პროფკავშირის წევრმა, მინდელის შახტის ტრანსპორტის უბნის უფროსის თანაშემწემ გიგა ისაკაძემ ”ინტერპრესნიუსს” განუცხადა, სავარაუდოდ, ქანები ჩამოიშალა, რამაც შახტაში მყოფი მუშები მოიყოლა.

„ვარაუდია, რომ სამთო დარტყმა იყო, ანუ ქანების თვითჩამოშლა მოხდა. ჯერჯერობით, ამ ვარაუდის დადასტურება არ შეგვიძლია, უნდა ვნახოთ ადგილზე რა მოხდა“, - განაცხადა გიგა ისაკაძემ.

ტყიბულის შახტაში უბედური შემთხვევა, 04:00 საათზე მოხდა. შემთხვევის შედეგად, 6 ადამიანი დაიღუპა, 3 კი დაშავდა. დაშავებულები საავადმყოფოში გადაიყვანეს.

იხილეთ ვიდეო: უბედური შემთხვევა ტყიბულის შახტაში: დაიღუპა 6 ადამიანი, არიან დაშავებულებიც