ზაქარია ქუცნაშვილი - არ არის ლამაზი, როცა მთავარსარდალი დარბაზიდან გადის

ვალდებული ვარ, როგორც ადამიანმა და როგორც მთიელმა, ბატონ პრეზიდენტს ვუთხრა: - არ არის ლამაზი, როცა მთავარსარდალი დარბაზიდან გადის, - აღნიშნული განცხადება პარლამენტის პლენარულ სხდომაზე, “ქართული ოცნების“ დეპუტატმა ზაქარია ქუცნაშვილმა გააკეთა.

“ეს დარბაზი უმაღლესი წარმომადგენლობითი ორგანოა. ვსაუბროთ თქვენი ხელმძღვანელობით (პრეზიდენტი მყავს მხედველობაში) უშიშროების საბჭოს შენარჩუნების აუცილებლობაზე და ამ დროს, მორიგ სიტყვას არ ველოდებით. მოგვწონს სტრატეგიული მოთმინების პოლიტიკა და ამ დროს რამდენიმე საათით მოთმინება გვიჭირს. რა უფლება მაქვს თქვენს პირად ემოციას შევეხო, მაგრამ ხომ იცით, სახელმწიფო პოლიტიკურ პირებს პირად ემოციაზე აყოლის უფლება არა გვაქვს“, - განაცხადა ქუცნაშვილმა პრეზიდენტის მისამართით.

მას შემდეგ, რაც პარლამენტმა მიიღო გადაწყვეტილება, რომ დებატებში პრეზიდენტის პერმანენტული მონაწილეობისთვის ცვლილებები არ განხორციელდებოდა, საქართველოს პრეზიდენტმა გიორგი მარგელაშვილმა პარლამენტის შენობა დატოვა.