პროკურატურის ერთ-ერთი „ოქროს მოწმის“ ჩვენებით, არც ერთი ბრალდებულის მიერ დანის გამოყენება არ დადასტურდა, - ამის შესახებ ხორავას ქუჩაზე მოზარდების მკვლელობის საქმეზე ერთ-ერთი არასრულწოვანი ბრალდებულის ადვოკატმა ტარიელ კაკაბაძემ ჟურნალისტებს განუცხადა. მისი ინფორმაციით, დღევანდელ სასამართლო პროცესზე დაკითხულმა მოწმემაც მნიშვნელოვან გარემოებებთან დაკავშირბით ჩვენება შეცვალა და სასამართლოს განსხვავებული ინფორმაცია მიაწოდა.

„დავკითხეთ ერთ-ერთი ოქროს მოწმე, რომელმაც დაცვის მხარის შეფასებით არ დაადასტურა ბრალდებულებისთვის ბრალად წარდგენილი ქმედება. მისი ჩვენება პირდაპირ წინააღმდეგობაში მოდის ბრალდების დადგენილებასთან, პოზიციასთან და იმ ყველაფერთან, რის დამტკიცებასაც ცდილობს ბრალდების მხარე. მისი ჩვენებით არც ერთი ბრალდებულის მიერ დანაშაულის ჩადენის ფაქტი არ დადასტურდა, თუმცა მის მიერ გაჟღერებული გარკვეული გარემოებები ნამდვილად იყო თავსებადობაში რიგი მოწმეების ჩვენებებთან. მისი ჩვენებით, არც ერთი ბრალდებულის მიერ დანის გამოყენება არ დადასტურდა. მოწმეს საერთოდ არ უხსენებია ის, რომ კონკრეტულმა ბრალდებულმა კონკრეტულ პიროვნებას მიაყენა დანით ჭრილობა“, - განაცხადა ტარიელ კაკაბაძემ.