“გირჩის” წევრი ნიკა ობოლაძე დაკითხვის შემდეგ გამოუშვეს

პარტია “გირჩის” წევრი ნიკა ობოლაძე სამართალდამცველებმა დაკითხვის შემდეგ გამოუშვეს, - ამის შესახებ “ინტერპრესნიუსს” შინაგან საქმეთა სამინისტროში განუცხადეს.

უწყების პრესსამსახურის ინფორმაციით, აღნიშნულთან დაკავშირებით გამოძიება 265-ე მუხლით მიმდინარეობს, რაც ნარკოტიკული საშუალების შემცველი მცენარის უკანონო დათესვა-მოყვანას ან კულტივაციას გულისხმობს.

პარტია “გირჩის” წევრები კვლავ რჩებიან ვაკე-საბურთალოს პოლიციის განყოფილების მე-2 სამმართველოს შენობასთან და ელოდებიან კიდევ ერთი დაკავებული პირის გათავისუფლებას, რომელიც პარტია “გირჩის” წევრი არ არის, თუმცა, დაკავებულია ნარკოტიკული საშუალების გასაღების მიზნის გარეშე, მცირე ოდენობით უკანონოდ შეძენა-შენახვის და ექიმის დანიშნულების გარეშე მოხმარების, ასევე პოლიციელის კანონიერი მოთხოვნის დაუმორჩილებლობის ბრალდებით.

პარტიის წევრები ვარაუდობენ, რომ შესაძლოა, აღნიშნულ მოქალაქეზე სამართალდამცველებს ფიზიკური და ფსიქოლოგიური ზეწოლა განეხორციელებინათ.

თავად შინაგან საქმეთა სამინისტროში კი განმარტავენ, რომ მოქალაქე ნარკოლოგიური ექსპერტიზის ჩასატარებლად განყოფილებაშია გადაყვანილი, თუმცა კონკრეტულად რომელ განყოფილებაში, არ ასახელებენ.