„ევროპული საქართველო“ ვერ მიესალმება პრეზიდენტის ამ მცირეოდენ გამოხტომას, თუმცა ამავე დროს უმრავლესობას მართებდა მეტი მოქნილობის გამოჩენა, - განაცხადა „ევროპული საქართველოს“ წევრმა ოთარ კახიძემ. მისი თქმით, მათ სხდომა დატოვეს, რადგან პრეზიდენტი დარბაზში აღარ არის.
„პრეზიდენტმა წინასწარ იცოდა ფორმატი, მას ეს წინადადება უნდა დაეყენებინა სხდომის დაწყებამდე, რომელიც დებატების შუაში დააყენა ულტიმატუმის სახით. „ევროპული საქართველო“ ვერ მიესალმება მის მცირეოდენ გამოხტომას, თუმცა ამავე დროს უმრავლესობას მართებდა მეტი მოქნილობის გამოჩენა. ჩვენ დავაყენეთ საკითხი, მისცემოდა პრეზიდენტს დებატების მიმდინარეობისას კითხვებზე პასუხის გაცემის შესაძლებლობა. ეს არ იქნებოდა პრობლემა, რადგან რეგლამენტი ისედაც არ ითვალისწინებს პრეზიდენტის დასკვნით სიტყვას, მაგრამ დეპუტატები შეთანხმებულები ვართ, რომ ამ უფლებას ვანიჭებთ. ქვეყანა არ დაიქცეოდა, თუ შეიცვლებოდა რეგლამენტი. დიდი ბოდიში, „ევროპული საქართველო“ რომ იბარებს მთავრობას და რეგლამენტით ვალდებული არიან მოვიდნენ, მაშინ რატომ არ ახსენდებათ რეგლამენტი?! ამიტომ პრეზიდენტიც უნდა მოქცეულიყო უფრო სოლიდურად და უმრავლეობასაც მართებდა, რომ ეს დღე არ ჩაშლილიყო“, -განაცხადა ოთარ კახიძემ. მისი თქმით, დებატები პრეზიდენტის ანგარიშის განხილვას ეხება და როდესაც პრეზიდენტი დარბაზში არ არის, აღარ აქვს აზრი დებატებს, ამიტომ დატოვეს სხდომა.