დებატებს, განხილვებს და კითხვა-პასუხს აქვს შესაბამისი ფორმა, რომელიც უნდა იქნას დაცული, - ამის შესახებ ვიცე-პრემიერმა, საგარეო საქმეთა მინისტრმა მიხეილ ჯანელიძემ განაცხადა.
ჯანელიძე გამოეხმაურა საქართველოს პრეზიდენტის გადაწყვეტილებას, რომელმაც პარლამენტში მისი ყოველწლიური მოხსენებით გამოსვლისას რეგლამენტში ცვლილებების შეტანა და კითხვებზე პასუხების გაცემა მოითხოვა.
“რაც შეეხება განხილვებს პარლამენტში, მე ვფიქრობ, რომ ეს პოლიტიკური დებატები უნდა გამართულიყო შესაბამისი შეთანხმებული რეგლამენტის ფარგლებში. ეს იქნებოდა მნიშვნელოვანი საზოგადოებისთვის და ეს იქნებოდა ყველა კითხვაზე პასუხის გაცემის შესაძლებლობა. სამწუხაროდ, ეს ვერ შედგა და მნიშვნელოვანია, რომ იქნას დაცული რეგლამენტი და მოხდეს ინსტიტუტების პატივისცემა. ეს არის მნიშვნელოვანი დემოკრატიისთვის. დებატებს, განხილვებს, კითხვა-პასუხს აქვს შესაბამისი ფორმა, რომელიც უნდა იქნას დაცული. კონკრეტულ კითხვებზე კონკრეტული პასუხების მოსმენა არის მნიშვნელოვანი საზოგადოებისთვის“, - განაცხადა მიხეილ ჯანელიძემ.