ირაკლი აბესაძე - საპარლამენტო უმრავლესობა პრეზიდენტის შეთავაზებას გუშინდელი დებატების დროს, პოლიტიკური სიჯიუტის გამო არ დათანხმდა

„ევროპული საქართველოს“ წევრის, ირაკლი აბესაძის განცხადებით, საპარლამენტო უმრავლესობა პრეზიდენტის შეთავაზებას გუშინდელი დებატების დროს, პოლიტიკური სიჯიუტის გამო არ დათანხმდა.

როგორც აბესაძემ ჟურნალისტებს განუცხადა, „ევროპული საქართველო“ თანახმა იყო, რომ პრეზიდენტი პერმანენტულად ჩართულიყო დებატებში და ამ ფორმატში გაგრძელებულიყო პოლიტიკური დებატები საკანონმდებლო ორგანოში.

„დიახ, ჩვენ მხარს ვუჭერდით პოლიტიკურ გადაწყვეტილებას, რომ ბატონი პრეზიდენტი გიორგი მარგველაშვილი დარბაზში დარჩენილიყო და მისი აქტიური ჩართულობით გაგრძელებულიყო მსჯელობა საკითხებზე. თავდაპირველად, საქართველოს პარლამენტის თავმჯდომარემ და ზოგიერთმა დეპუტატმა წინასწარ მხარი დაუჭირეს ამ გადაწყვეტილებას, შემდეგ კი გადათქვეს მოსაზრება. კიდევ ერთხელ ვამბობ, რომ ეს იყო პოლიტიკური სიჯიუტე, რომ არ გაგრძელებულიყო არსობრივი მსჯელობა“, - განაცხადა აბესაძემ.