ზურაბ პატარაძე პრესის თავისუფლების საერთაშორისო დღისადმი მიძღვნილ კონფერენციას დაესწრო

აჭარის მთავრობის თავმჯდომარე, ზურაბ პატარაძე სასტუმრო ,,რედისონში“ გამართულ პრესის თავისუფლების საერთაშორისო დღისადმი მიძღვნილ კონფერენციას დაესწრო, - ამის შესახებ „ინტერპრესნიუსს“ აჭარის ავტონომიური რესპუბლიკის მთავრობიდან აცნობეს.

მათივე ცნობით, კონფერენციის მიზანი დემოკრატიული საზოგადოებისა და მედიაგანვითარების პროცესში საზოგადოებრივი მაუწყებლის როლისა და პრესის თავისუფლების, როგორც ღირებულების აღნიშვნაა. შეხვედრაზე მედიის წინაშე არსებულ გამოწვევებსა და საჭიროებებზე დისკუსია გაიმართა.

ზურაბ პატარაძემ მედიის წარმომადგენლებს პროფესიული დღესასწაული მიულოცა და აღნიშნა, რომ დღევანდელი მთავრობის პირობებში მედიასთან კომუნიკაცია მხოლოდ კონსტრუქციულ თანამშრომლობაზეა დაფუძნებული.

შეხვედრას აღმასრულებელი და საკანონმდებლო ხელისუფლების წარმომადგენლები, მედია ექსპერტები და ჟურნალისტები ესწრებოდნენ.

შეხვედრის ორგანიზატორები არიან საზოგადოებრივი მაუწყებლის აჭარის ტელევიზია და რადიო და ორგანიზაცია ,,აირექსი“. შეხვედრა უკვე მესამედ პრესის თავისუფლების დღეს სიმბოლურად იმართება.