კახა კალაძე - როდესაც ეკონომიკური მდგომარეობა იქნება გაუმჯობესებული, პირველი მე ვიქნები, ვინც ხელფასების მატების საკითხს დააყენებს

როდესაც ეკონომიკური მდგომარეობა იქნება გაუმჯობესებული, პირველი მე ვიქნები, ვინც ხელფასების მატების საკითხს დააყენებს, - ამის შესახებ თბილისის მერმა კახა კალაძემ თბილისის მეტროპოლიტენის მემანქანეების ხელფასებთან დაკავშირებული კითხვის პასუხად განაცხადა.

"დღეს მუნიციპალიტეტს არ აქვს იმის საშუალება, რომ 45%-იანი ხელფასის ზრდა განახორციელოს. აბსოლუტურად გაუგებარია მოთხოვნა. კიდევ ერთხელ ვიმეორებ, რომ ჩემს თანამშრომლებს რაღაც ჯგუფებად არ ვყოფ და პრიორიტეტებს არ ვანიჭებ. ჩემთვის მათი ყველას საქმიანობა არის ძალიან მნიშვნელოვანი და ყველას აქვს უდიდესი პასუხისმგებლობა პირველ რიგში, დედაქალაქის მოსახლეობის მიმართ. შესაბამისად, როდესაც ეკონომიკური მდგომარეობა იქნება გაუმჯობესებული, პირველი ვიქნები მე, ვინც დააყენებს საკითხს, რომ ხელფასების მატება უნდა იყოს არა მხოლოდ მეტროს მემანქანეების მიმართ. ჩვენ გვაქვს რიგი მიმართულებები, სადაც ორჯერ და სამჯერ ნაკლებ ხელფასებს იღებენ ადამიანები. უდიდესი პასუხისმგებლობა აკისრიათ მათაც იმ საქმიანობაში, რასაც აკეთებენ, მაგრამ ქვეყნის სიყვარულით, პასუხისმგებლობით გრძნობებით ეპყრობიან. მათ იციან, როდესაც საშუალება გაჩნდება, ჩვენ მაშინვე მივიღებთ გადაწყვეტილებას, რომ ეს პრობლემები მოგვარდეს, მათ შორის მემანქანეების", - განახადა კალაძემ.

შეგახსენებთ, რომ თბილისის მეტროპოლიტენის თანამშრომელთა ნაწილი სატრანსპორტო კომპანიისგან ხელფასის 45%-მდე გაზრდას ითხოვს. აღნიშნულთან დაკავშირებით თბილისის მთავრობის სხდომაზე პოზიცია დააფიქსირა დედაქალაქის მერმაც, რომელმაც ხელფასის მომატებაზე კატეგორიული უარი განაცხადა. თბილისის მეტროპოლიტენის თანამშრომლების ნაწილმა დღეს გაფიცვა დაანონსა, თუმცა ცნობილი გახდა, რომ ისინი არ გაიფიცებიან, რადგან მათი განმარტებით, თბილისის სატრანსპორტო კომპანიას 30-დღიანი ვადა მისცეს, რათა აღნიშნულ საკითხზე მოხდეს კონსენსუსის მიღწევა. წინააღმდეგ შემთხვევაში კი მეტროპოლიტენის თანამშრომლები გაფიცვას 30 დღის შემდეგ გეგმავენ.

ვახტანგ ძაბირაძე -  შემოდგომა იქნება ოპოზიციურ ფლანგზე ძალების ჩამოყალიბების პროცესი, ამიტომ არ მაქვს მოლოდინი, რომ ცხელი შემოდგომა გვექნება
ქართული პრესის მიმოხილვა 20.08.2019
გავლენის ოპერაციები ანუ „მკვლელობათა ჯაჭვი“
პროექტ „ბათუმი რივიერასთან“ დაკავშირებით „სილქროუდ ჯგუფი“ განცხადებას ავრცელებს