მიხეილ ჩხენკელი დიდი ბრიტანეთის უმაღლესი განათლების, მეცნიერების, კვლევისა და ინოვაციის მინისტრს შეხვდა

საფრანგეთში ოფიციალური ვიზიტით მყოფი საქართველოს განათლებისა და მეცნიერების მინისტრი მიხეილ ჩხენკელი, დიდი ბრიტანეთის უმაღლესი განათლების, მეცნიერების, კვლევისა და ინოვაციის მინისტრს სემ ჯიმას შეხვდა.

როგორც „ინტერპრესნიუსს“ განათლების სამინისტროდან აცნობეს, შეხვედრაზე მხარეებმა თანამშრომლობის გაღრმავებასა და სამომავლო გეგმებზე იმსჯელეს.

მათივე ცნობით, შეხვედრაზე განსაკუთრებული აქცენტი გაკეთდა უმაღლესი და პროფესიული განათლების მიმართულებებზე და ახლო მომავალში გაცვლითი პროგრამების შემუშავებაზე.

„როგორც ქართველ, ასევე ბრიტანელ სტუდენტებსა და პროფესორ-მასწავლებლებს შესაძლებლობა ექნებათ, ისარგებლონ საერთაშორისო პროგრამებით, რაც მინისტრების აზრით, ხელს შეუწყობს ქვეყნებს შორის აკადემიური კავშირების გაღრმავებას.

ბრიტანელმა კოლეგამ მნიშვნელოვნად და საინტერესოდ შეაფასა პროფესიული განათლების კუთხით საქართველოში განხორციელებული პროექტები, მათ შორის, საუნივერსიტეტო სივრცეში კოლეჯების დაფუძნება. მისი აზრით, მსგავსი მიდგომა ცალსხად შეუწყობს ხელს, ერთი მხრივ, პროფესიული განათლების პოპულარიზაციას, მეორე მხრივ, სწავლის ხარისხის ამაღლებას.

მიხეილ ჩხენკელთან შეხვედრაზე ბრიტანელმა კოლეგამ აღნიშნა, რომ პროფესიული განათლების პოპულარიზაციის, კერძოდ, სტუდენტთა პროფესიული განათლებით დაინტერესების პრობლემა დიდ ბრიტანეთშიც არსებობს, რაშიც პოზიტიურ როლს დამსაქმებელთა აქტიურობა თამაშობს.

შეხვედრის დასასრულს მინისტრებმა განათლების ყველა დონეზე და მეცნიერების სფეროში ერთობლივი პროექტების განხორციელებაზე იმსჯელეს. მიხეილ ჩხენკელმა ბრიტანელი კოლეგა სემ ჯიმა საქართველოში სტუმრად მოიწვია“, - აღნიშნულია განათლების სამინისტროს მიერ გავრცელებულ ინფორმაციაში.