ფოთში, აზიური ფაროსანას საწინააღმდეგო ქიმიური წამლობა დღეს დილის საათებში დაიწყება, - ამის შესახებ ,,ინტერპრესნიუსს“ ფაროსანასთან ბრძოლის საკოორდინაციო შტაბში განუცხადეს.

მათი ინფორმაციით, თერმული ნისლის ტექნოლოგიის გამოყენებით დამუშავდება 300 ჰა-მდე ფართობი. ქალაქში მობილიზებული და გადანაწილებულია 4 ერთეული ტექნიკა.

„უსაფრთხოების ზომების დაცვის მიზნით შეწამვლითი სამუშაოების დაწყების შესახებ ადგილობრივი მოსახლეობა ინფორმირებულია. გარემოს დაცვისა და სოფლის მეურნეობის სამინისტროსა და სურსათის ეროვნული სააგენტოს წარმომადგენლები ფოთში იმყოფებიან. ისინი შეწამვლის ღონისძიებებს ადგილობრივ მუნიციპალიტეტთან ერთად განახორციელებენ“, - აცხადებენ ფაროსანასთან ბრძოლის საკოორდინაციო შტაბში.

ქიმიური შეწამვლა ფოთის მუნიციპალიტეტის ოთხივე უბანში 07:00 საათზე ერთდროულად დაიწყება.