არ არსებობს არგუმენტი, რატომ არ უნდა შეიქმნას საგამოძიებო კომისია, თუმცა ძალიან კარგად ჩანს, რომ ხელისუფლება ასეთი სერიოზულ სკანდალის გარშემო, არანაირ პასუხისმგებლობას არ იღებს, - ამის შესახებ „ევროპული საქართველოს“ წევრმა ელენე ხოშტარიამ აზერბაიჯანელი ჟურნალისტის აფგან მუხთარლის საქმის გამოძიებასთან დაკავშირებით განაცხადა. მისი თქმით, „ევროპული საქართველო“ აღნიშნულ საქმეზე საგამოძიებო კომისიის შექმნის საკითხს კვლავ მიუბრუნდება.

„ერთი წელია გასული მას შემდეგ, რაც ჩვენი ქალაქიდან გაუჩინარდა ადამიანი და აღმოჩნდა სხვა ქვეყანაში. ჩვენ, რა თქმა უნდა, მივუბრუნდებით საგამოძიებო კომისიის საკითხს, იმიტომ, რომ არ არსებობს არგუმენტი რატომ არ უნდა შეიქმნას საგამოძიებო კომისია, თუმცა ძალიან კარგად ჩანს, რომ ხელისუფლება ასეთი სერიოზულ სკანდალის გარშემო, არანაირ პასუხისმგებლობას არ იღებს“, - განაცხადა ელენე ხოშტარიამ.

ჟურნალისტი აფგან მუხთარლი თბილისიდან გასული წლის 29 მაისს გაუჩინარდა. მოგვიანებით აღმოჩნდა, რომ ის აზერბაიჯანში იმყოფება. აფგან მუხთარლის ბრალი სამი მუხლით - აზერბაიჯანის სახელმწიფო საზღვრის უკანონოდ გადაკვეთის, კონტრაბანდის და ხელისუფლების წარმომადგენლისთვის წინააღმდეგობის გაწევის და ძალადობის მუხლებით ჰქონდა წაყენებული.