საქართველოს პროფკავშირების მიერ უკრაინიდან მოწვეული ექსპერტები, რომლებიც მინდელის შახტში არსებულ ვითარებას სწავლობენ, დასკვნას 8 ივნისს დადებენ.

როგორც "ინტერპრესნიუსს" საქართველოს პროფკავშირებში განუცხადეს, ამჟამად მოწვეული ექსპერტები სამუშაოების ბოლო პროცედურებს ახორციელებენ.

უკრაინელი სამთო ექსპერტები ტყიბულის შახტაში მომხდარი ავარიის და კომპანიის სამომავლო მუშაობაზე საკუთარი ხედვის დასაფიქსირებლად 25 აპრილს ჩაერთვნენ. ექსპერტებმა დაათვალიერეს შახტა, სადაც ავარია მოხდა.

როგორც სამთო ექსპერტთა ჯგუფის ხელმძღვანელმა კაროლ ვიაჩისლავმა სამუშაოების დაწყებამდე განაცხადა, კომპანია „საქნახშირი ჯი-აი-ჯი ჯგუფმა“ მათ ყველა სახის დოკუმენტაცია გადასცა, რომელსაც ისინი ეტაპობრივად შეისწავლიან.

შეგახსენებთ, რომ 5 აპრილს, ტყიბულში, მინდელის სახელობის შახტაში მომხდარი უბედური შემთხვევის შედეგად 6 ადამიანი დაიღუპა და 3 დაშავდა.