აქცის დასრულების მიუხედავად, ზაზა სარალიძე და ზვიად კუპრავა, რამდენიმე მხარდამჭერთან ერთად პარლამენტის შენობასთან დარჩენას მთელი ღამე აპირებენ.

როგორც ზვიად კუპრავამ განაცხადა, რუსთაველის გამზირზე ფართომასშტაბიანი საპროტესტო აქცია ხვალ, 16:00 საათზე განახლდება. მისივე თქმით, აქციაზე დასასწრებად მოქალაქეები საქართველოს ყველა კუთხიდან ჩამოვლენ.

რაც შეეხება ამჟამად მიმდინარე აქციას, კუპრავას თქმით, აქცია წვიმის მიუხედავად მაინც გაგრძელდება და ცოტა ხანში პარლამენტთან კარვებს მიიტანენ.

თბილისის საქალაქო სასამართლომ ხორავას ქუჩაზე მოზარდების მკვლელობის საქმეზე ბრალდებულების მიმართ ნაწილობრივ გამამტყუნებელი განაჩენი დაადგინა. მოსამართლე ეკა არეშიძის გადაწყვეტილებით, გ.ბ, რომელსაც ბრალი, როგორც ლევან დადუნაშვილის ასევე დავით სარალიძის განზრახ მკვლელობაში ედებოდა, მხოლოდ ლევან დადუნაშვილის მკვლელობის ეპიზოდში იქნა დამნაშავედ ცნობილი. რაც შეეხება დავით სარალიძის მკვლელობის ეპიზოდს, სასამართლომ გ.ბ. ამ ნაწილში სრულად გაამართლა. რაც შეეხება მეორე ბრალდებულს, რომელსაც პროკურატურა დავით სარალიძის განზრახ მკვლელობას ედავებოდა, სასამართლომ გ.ჯ.-ს ბრალი გადაუკვალიფიცირა და სარალიძის განზრახ მკვლელობის მცდელობაში ცნო დამნაშავედ. გამოტანილი განაჩენიდან გამომდინარე, ბრალდებულებთან მიმართებაში სასამართლო სასჯელის ვადას და ზომას ხვალ განსაზღვრავს.

შეგახსენებთ, რომ ხორავას ქუჩაზე ორი მოზარდი 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი ექიმების მცდელობისა და რამდენიმე ოპერაციის ჩატარების მიუხედავად 2 დეკემბერს საავადმყოფოში გარდაიცვალა.