ყველაზე დაბალი სარეიტინგო ქულის მქონე სოციალურად დაუცველი ოჯახის პატარებს, ბავშვთა დაცვის საერთაშორისო დღე, ქუთაისის საკრებულოს თავმჯდომარემ, ნიკოლოზ ლატარიამ, შვილთან ერთად მიულოცა.
სოციალურ სააგენტოში ქუთაისის მასშტაბით ყველაზე დაბალი ქულის მქონე სამი ოჯახი ფიქსირდება, სადაც 10 მოზარდი ცხოვრობს. ბავშვთა დაცვის საერთაშორისო დღეს კი მათ ნიკოლოზ ლატარიამ სიურპრიზი გაუკეთა და ბავშვები გასართობ ცენტრში მიიწვია. დღესვე პატარებმა კინო „ქუთაისში“ ანიმაციური ფილმი ნახეს და დღის ბოლოს საკრებულოს თავმჯდომარისგან საჩუქრები მიიღეს. პატარებს სათამაშოები, თინეიჯერებს კი აიფონ 4S მობილური ტელეფონები გადაეცათ.
„სურვილი მქონდა ამ ბავშვებისთვის ერთი ლამაზი დღე მეჩუქებინა. 1-ელი ივნისი მართლაც, რომ განსაკუთრებული დღეა და ყველა ბავშვი იმსახურებს იყოს ბედნიერი. მინდა ყველა პატარას მივულოცო ეს დღე და უსაფრთხო გარემოში ცხოვრება ვუსურვო“, - აღნიშნა ნიკოლოზ ლატარიამ.