საგამოძიებო კომისიის შექმნა არის ყველაზე ხმამაღალი განაცხადი, რაც შეიძლებოდა გაეკეთებინა უმაღლეს საკანონმდებლო ორგანოს, - ამის შესახებ საპარლამენტო უმრავლესობის წევრმა ზაზა გაბუნიამ “პალიტრანიუსის“ გადაცემა „360 გრადუსის“ ეთერში, ხორავას ქუჩაზე მომხდარ მკვლელობასთან დაკავშირებით შექმნილი საგამოძიებო კომისიის საქმიანობის კომენტირებისას განაცხადა.
“გამიჭირდება გითხრათ, კონკრეტული თანამდებობის პირების მიერ რატომ არ იქნა გადაწყვეტილება მიღებული უფრო ადრე შეხვედრასთან დაკავშირებით. მე შემიძლია გიპასუხოთ, მიიღო თუ არა მყისიერი გადაწყვეტილებები ინსტიტუციამ, რომელსაც მე წარმოვადგენ. მივიღეთ დროული გადაწყვეტილება და ავამუშავეთ პარლამენტის ხელში არსებული უპრეცედენტო ინსტრუმენტი, რომელიც მოიტანს არა მარტო გამოძიებასთან დაკავშირებით შეკითხვებზე პასუხებს, არამედ იმ უფლებამოსილ პირებთან დაკავშირებით პასუხებსაც, იმოქმედეს თუ არა მათ კანონის ფარგლებში, დააფარეს თუ არა ხელი ცალკეულ ადამიანებს და ამ კომისიის შექმნა ნიშნავს სწორედ იმას, რომ ჩვენ, უმაღლესი საკანონმდებლო ორგანო მზად ვართ, რომ ამ შეკითხვებზე ინსტიტუციამ გასცეს პასუხები. ეს არის ყველაზე ხმამაღალი განაცხადი, რაც შეიძლებოდა გაეკეთებინა უმაღლეს საკანონმდებლო ორგანოს“, - განაცხადა გაბუნიამ.