იტალიის ახალი მთავრობა რუსეთისთვის სანქციების გადახედვის საკითხს წამოაყენებს, - ამის შესახებ იტალიის პრემიერ-მინისტრმა ჯუზეპე კონტემ განაცხადა.
„ჩვენ რუსეთთან მიმართებაში ღია პოლიტიკას დავუჭერთ მხარს. ბოლო დროს რუსეთმა სხვადასხვა გეოპოლიტიკური კრიზისების გადაჭრაში თავისი როლის კონსოლიდირება მოახდინა. ჩვენ წამოვწევთ სანქციების სისტემის გადახედვის საკითხს. საუბარია განსაკუთრებით იმ სანქციებზე, რომელიც რუსეთის ეკონომიკასა და სამოქალაქო საზოგადოებას ურტყამს“, - განაცხადა ჯუზეპე კონტემ.
ამავდროულად მან აღნიშნა, რომ იტალია ჩრდილოატლანტიკური ალიანსის ერთგული წევრი რჩება, ხოლო აშშ კი მისი პრივილეგირებული პარტნიორია.
აღსანიშნავია, რომ რუსეთისთვის სანქციების მოხსნის პუნქტი ჩართული იყო ე.წ. „სამთავრობო კონტრაქტში“, რომელიც მინისტრთა ახალი კაბინეტის შექმნამდე „მოძრაობა ხუთ ვარსკვლავმა“ და პარტია „ლიგამ“ დადეს.