საქართველოს რეგიონული განვითარებისა და ინფრასტრუქტურის მინისტრმა მაია ცქიტიშვილმა და მინისტრის პირველმა მოადგილემ, საავტომობილო გზების დეპარტამენტის თავმჯდომარემ ირაკლი ქარსელაძემ უმსხვილესი ამერიკული კომპანია Bechtel-ის წარმომადგენლებს დაგეგმილი ინფრასტრუქტურული პროექტები გააცნეს, - ამის შესახებ „ინტერპრესნიუსს“ რეგიონული განვითარებისა და ინფრასტრუქტურის სამინისტროდან აცნობეს. როგორც მაია ცქიტიშვილმა აღნიშნა, 2021 წლისთვის ჩქაროსნული ავტომაგისტრალის დასრულება იგეგმება.
„ჩვენი ქვეყნის ისტორიაში უპრეცედენტო მასშტაბის პროექტებს ვახორციელებთ. 2021 წლისთვის სივრცითი მოწყობის პროგრამით გათვალისწინებული ჩქაროსნული ავტომაგისტრალების დასრულებას ვგეგმავთ. ზაფხულში რიკოთის და ქვეშეთი-კობის მონაკვეთებზე ტენდერებს გამოვაცხადებთ. პროექტების მნიშვნელობიდან და სირთულიდან გამომდინარე, დაინტერესებული ვართ, მაღალი სტანდარტის გამოცდილ კომპანიებთან ვითანამშრომლოთ, რათა ხარისხიანი საგზაო ინფრასტრუქტურა მივიღოთ“, - განაცხადა მაია ცქიტიშვილმა.
ირაკლი ქარსელაძემ კომპანიის წარმომადგენლებს რიკოთის საუღელტეხილო მონაკვეთის, ქვეშეთი-კობის, რუსთავი-წითელი ხიდის, ალგეთი-სადახლოსა და ფოთის ხიდის პროექტების შესახებ დეტალური ინფორმაცია მიაწოდა.
„Bechtel 1898 წელს დაარსდა და საინჟინრო-სამშენებლო მიმართულებით მუშაობს. კომპანია, რომელიც წელს უმსხვილეს ამერიკულ კომპანიად დასახელდა, ინფრასტრუქტურულ პროექტებს 160 ქვეყანაში ასრულებს, მათ შორის ბალკანეთის ქვეყნებსა და თურქეთში. Bechtel - მა საქართველოში უკვე განახორციელა რამდენიმე პროექტი ენერგეტიკის სფეროში“, - ნათქვამია სამინისტროს ინფორმაციაში.