საქართველოს საპარლამენტო დელეგაცია სოფო კილაძის ხელმძღვანელობით, ვაშინგტონში კონგრესმენ რობერტ პიტენგერს შეხვდა.

როგორც „ინტერპრესნიუსს“ საქართველოს პარლამენტიდან აცნობეს, დელეგაციის შემადგენლობაში შედიან: რატი იონათამიშვილი, ირაკლი ბერაია და გიორგი ტუღუში.

„ქართველმა პარლამენტარებმა აღნიშნეს ქართულ-ამერიკული ურთიერთობების მნიშვნელობა და ამერიკის განსაკუთრებული მხარდაჭერა საქართველოში მიმდინარე დემოკრატიული რეფორმებისა და ადამიანის უფლებების დაცვის კუთხით. დელეგაციამ ისაუბრა, საკონსტიტუციო რეფორმის შესახებ, ისევე, ადამიანის უფლებათა და სამოქალაქო ინტეგრაციის კომიტეტის პრიორიტეტებსა და საქმიანობაზე. ქართული მხარის მიერ განსაკუთრებულად იქნა ხაზგასმული საქართველოსა და ამერიკას შორის თავისუფალი ვაჭრობის ხელშეკრულების როლი და მნიშვნელობა, როგორც ამერიკის შეერთებული შტატების, ასევე, საქართველოსათვის. ისაუბრეს იმ კონკრეტულ დადებით შედეგებზე, რასაც ორივე ქვეყნისათვის მოიტანს ხელშეკრულების ამოქმედება.

კონგრესმენმა დაადასტურა აშშ-ს განსაკუთრებული მხარდაჭერა სტრატეგიულ პარტნიორთან, საქართველოსთან მიმართებით, მათ შორის, დემოკრატიული და ადამიანის უფლებების სფეროში რეფორმების კუთხით. მისივე განცხადებით, კონგრესმენი მხარს უჭერს საქართველოსა და ამერიკას შორის თავისუფალი ვაჭრობის ხელშეკრულების ხელმოწერას“, - ნათქვამია პარლამენტის მიერ გავრცელებულ ინფორმაციაში.

ვიზიტი ხორციელდება აშშ-ში საქართველოს საგანგებო და სრულუფლებიანი ელჩის, დავით ბაქრაძის მხარდაჭერით.