საგარეო საქმეთა მინისტრი მიხეილ ჯანელიძე იმედოვნებს, რომ ევროპარლამენტი საქართველოს ოკუპირებულ ტერიტორიებთან დაკავშირებით ხვალ მკაფიო რეზოლუციას მიიღებს.
„ძალიან მნიშვნელოვანია ევროკავშირის მხარდაჭერა, რომელიც ევროპარლამენტში დებატებით და უმაღლესი წარმომადგენლის ფედერიკა მოგერინის მხრიდან გაკეთებულ განცხადებებში გამოიხატა. ის იყო ძალიან მკაფიო ყველა იმ პრობლემასთან დაკავშირებით, რომელიც ოკუპირებულ რეგიონებშია და თან ახლავს რუსეთის მიერ საქართველოს ტერიტორიების ოკუპაციას. დარწმუნებული ვართ, ასეთივე მკაფიო იქნება რეზოლუცია, რომელსაც, იმედია, ხვალ მიიღებს ევროკავშირის პარლამენტი. ოკუპაცია დგას ძალიან აქტიურად საერთაშორისო ფორმატებში განხილვის დღის წესრიგში. საერთაშორისო საზოგადოება მხარდაჭერის კუთხით უპრეცედენტოდ აქტიურია და ჩვენ გავაგრძელეთ ჩვენს ძალისხმევას, რათა საერთაშორისო სამართლის, საერთშორისო პრინციპებისა და საერთაშორისო საზოგადოების მხარდაჭერით, კონფლიქტის მშვიდობიანი დარეგულირება შევძლოთ“, - განაცხადა ჯანელიძემ.
ხვალ, სტრასბურგში მიმდინარე პლენარულ სესიაზე ევროპარლამენტი თემაზე „საქართველოს ოკუპირებული ტერიტორიები - ათი წელი რუსეთის შეჭრის შემდეგ“ დებატებს გამართავს და რეზოლუციას მიიღებს.