აშშ-ს ხელისუფლება დღეს ოფიციალურად გამოაცხადებს სამხრეთ კორეასთან ერთობლივი სამხედრო წვრთნების შეჩერებას, -ამის შესახებ ტელეარხი CNN აშშ-ს პრეზიდენტის ადმინისტრაციაში წყაროზე დაყრდნობით იუწყება.

წყაროს ინფორმაციით, საუბარია Ulchi Freedom Guardian-ის სამხედრო წვრთნებზე. აღსანიშნავია, რომ აქამდე პენტაგონში განაცხადეს, რომ აღნიშნულთან დაკავშირებით ოფიციალური მითითებები არ მიუღიათ.

CNN ასევე აღნიშნავს, რომ ჯერ უცნობია, განიხილა თუ არა აშშ-ს პრეზიდენტმა სამხრეთ კორეასთან სამხედრო წვრთნების შეჩერების საკითხი ამერიკელ სამხედროებთან.

თავის მხრივ, ტელეარხი Fox News ასევე წყაროზე დაყრდნობით იუწყება, რომ იმ შემთხვევაში თუ ჩრდილოეთ კორეა დენუკლეარიზაციისთვის საჭირო ნაბიჯებს არ გადადგამს, აშშ კვლავ გაანახლებს სამხედრო მანევრების ჩატარებას კორეის ნახევარკუნძულზე.