გაერო-ს გენერალურმა ასამბლეამ გუშინ პალესტინელი სამოქალაქო პირების წინააღმდეგ ისრაელის მიერ გადამეტებული ძალის გამოყენება დაგმო.
რეზოლუციას მხარი 120-მა ქვეყანამ დაუჭირა, 45-მა ქვეყანამ თავი შეიკავა, ხოლო რვამ - აშშ-მ, ისრაელმა, მარშალის კუნძულებმა, სოლომონის კუნძულებმა, ნაურუმ, ავსტრალიამ, მიკრონეზიამ და ტოგომ რეზოლუციის წინააღმდეგ მისცეს ხმა.
გენერალური ასამბლეაში განსახილველად აღნიშნული რეზოლუცია ალჟირმა შეიტანა, მას შემდეგ რაც ივნისის დასაწყისში აშშ-მ გაერო-ს უშიშროების საბჭოს ანალოგიურ რეზოლუციას ვეტო დაადო.
„ეს აბსოლუტურად ცალმხრივი რეზოლუციაა. მასში საერთოდ არ არის ნახსენები „ჰამასი“, რომლის ტერორისტებიც რეგულარულად ახდენენ ღაზას სექტორში ძალადობის ინიცირებას“, - განაცხადა კენჭისყრის წინ გაერო-ში აშშ-ს ელჩმა ნიკი ჰეილიმ.
რეზოლუცია მოითხოვს ისრაელისგან „პალესტინის მშვიდობიანი მოსახლეობის წინააღმდეგ გადამეტებული, არაპროპორციული ძალის გამოყენებისგან თავი შეიკავოს“.