თურქეთის სამხრეთ-აღმოსავლეთში, ქვეყნის მმართველი პარტიის „სამართლიანობისა და განვითარების პარტიის“ საარჩევნო კამპანიის წევრებსა და მოვაჭრეთა შორის მომხდარი დაპირისპირების შედეგად, სამი ადამიანი დაიღუპა. ამის შესახებ წყაროზე დაყრდნობით „როიტერი“ იუწყება.

მმართველი პარტიის დეპუტატი იბრაჰიმ ჰალილ ილდიზი შანლიურფას პროვიცნიაში, სურუჩის რაიონში ერთ-ერთ მაღაზიაში იმყოფებოდა, როდესაც მის გარემოცვასა და მაღაზიების მფლობელებს შორის ჩხუბი ატყდა. მისი ძმა და ორი ადამიანი მოწინააღმდეგე მხარის მიერ გახსნილი ცეცხლის შედეგად დაიღუპნენ. არსებული ინფორმაციით, რვა ადამიანი ჰოსპიტალიზებულია. პოლიციამ 10 ადამიანი დააკავა.

თურქეთში ვადამდელი არჩევნები 24 ივნისს იმართება.