საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) წევრმა - ენერგეტიკული თანამეგობრობის მარეგულირებელი საბჭოს (ECRB) პრეზიდენტმა გიორგი ფანგანმა აღმოსავლეთ პარტნიორობის მე-7 სამუშაო შეხვედრაში მიიღო მონაწილეობა და ენერგეტიკის სექტორში მიწოდების უსაფრთხოების შესახებ პრეზენტაცია წარადგინა.

როგორც „ინტერპრესნიუსს“ სემეკ-იდან აცნობეს, გიორგი ფანგანმა დეტალურად მიმოიხილა მარეგულირებელი აქტივობების რეგიონული თანამშრომლობის პლატფორმა და ენერგეტიკის რეგულირების საუკეთესო პრაქტიკა.

ევროპის ენერგეტიკის მარეგულირებელთა საბჭოსა (CEER) და ევროპული კომისიის ორგანიზებით უნგრეთში, ბუდაპეშტში აღმოსავლეთ პარტნიორობის მე-7 სამუშაო შეხვედრა მიმდინარეობს. შეხვედრის მთავარი თემაა ენერგეტიკის სექტორში მიწოდების უსაფრთხოება. შეხვედრას აზერბაიჯანის, ბელარუსის, მოლდოვას, უკრაინის, ავსტრიის, ჩეხეთის, უნგრეთის მარეგულირებელი კომისიების, ენერგეტიკის რეგულირების რეგიონული ასოციაციის წარმომადგენლები ესწრებიან.