ხორავას ქუჩაზე მოკლული მოზარდის, დავით სარალიძის მამა ზაზა სარალიძე თბილისის საქალაქო სასამართლოსგან, საქმეზე გამოტანილი განაჩენის სამოტივაციო ნაწილის გადაცემას ითხოვს. მან ადვოკატთან ერთად სასამართლოს ოფიციალური განცხადებით უკვე მიმართა. როგორც სარალიძემ განმარტა, მას განაჩენის შინაარსი აინტერესებს.
„განაჩენს ვითხოვ. მაინტერესებს იმ განაჩენში რა წერია. განცხადება ჩავაბარე. იმის გამო, რომ გამოკითხვაზე მეჩქარებოდა, პასუხს აღარ დაველოდე", - განაცხადა ზაზა სრალიძემ.
შეგახსენებთ, რომ ხორავას ქუჩაზე ორი მოზარდი 1-ელ დეკემბერს დაჭრეს. ლევან დადუნაშვილი საავადმყოფოში მიყვანამდე გარდაიცვალა, დავით სარალიძე კი ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში გარდაიცვალა.
არასრულწლოვანის, ლევან დადუნაშვილის განზრახ მკვლელობაში დამნაშავედ ცნობილ გ.ბ-ს სასამართლომ 10 წელი 6 თვე მიუსაჯა, ხოლო დამამძიმებელ გარემოებაში არასრულწლოვან დავით სარალიძის განზრახ მკვლელობის მცდელობაში ბრალდებულ გ.ჯ.-ს 9 წელი და 9 თვე მიესაჯა.