ხორავას ქუჩაზე მოკლული დავით სარალიძის მამა, ზაზა სარალიძე თბილისის პროკურატურას მიმართავს და ბორის კაკუბავას წინააღმდეგ შეტანილ განცხადებაზე რეაგირების შესახებ ინფორმაციას ითხოვს.
როგორც მან ჟურნალისტებს განუცხადა, პროკურატურას დაახლოებით, ორი თვის წინ მიმართა, რათა კაკუბავას მიერ გაკეთებულ საჯარო განცხადებებს შესაბამისი სამართლებრივი რეაგირება მისცემოდა.
"მივმართავ თბილისის ვითომ პროკურატურას, რომელმაც საკმაოდ გააყალბა ეს საქმე, დაუყოვნებლივ გაასაჯაროოს იმ განცხადებაზე სამართლებრივი რეაგირების შესახებ ინფორმაცია, რომელიც მე ბორის კაკუბავას წინააღმდეგ შევიტანე. რატომ მალავენ ამ ყველაფერს. დაახლოებით, ორი თვის წინ მივმართე", - განაცხადა ზაზა სარალიძემ.
ხორავას ქუჩაზე მოკლული მოზარდის მამა ასევე გორის პროკურატურასაც მიმართავს, რათა გორის მერის თანაშემწის განცხადებებზე რეაგირება მოახდინონ.
"ასევე მივმართავ გორის პროკურატურას, დაუყოვნებლივ მოახდინოს რეაგირება მერის თანაშემწის მიმართ, რომელმაც განაცხადა , რომ არ დაგავიწყდეთ, ხალხო, საიდან დაიწყო ეს ინციდენტიო. ე.ი. ამას რომ ამბობს, რაღაც იცის ამ ინდიცდენტზე. ამაზე პროკურატურამ დაუყოვნებლივ უნდა მოახდინოს რეაგირება და მისცეს სამართლებრივი შეფასება. თუ ტყუილს იძახის ეს კაცი, ადგეს, ხელახლა გამოვიდეს ტელევიზიებით და აღიაროს თავისი დანაშაული, თუ არა და პასუხისგებაში მისცენ", - აღნიშნა სარალიძემ.