აშშ-ს პრეზიდენტ დონალდ ტრამპსა და კანადის პრემიერ-მინისტრ ჯასტინ ტრუდოს შორის ურთიერთობის გამწვავების შემდეგ, ზოგიერთმა კანადელმა ამერიკულ პროდუქციას ბოიკოტი გამოუცხადა, - ამის შესახებ ინფორმაციას ტელეარხი CTV ავრცელებს.
ტრამპის ადმინისტრაციასა და კანადის მთავრობას შორის ურთიერთობა ბოლო კვირების განმავლობაში მას შემდეგ გამწვავდა, რაც აშშ-მ ალუმინისა და ფოლადის იმპორტზე ტარიფები გაზარდა. ასევე ჩიხში შევიდა მოლაპარაკებები აშშ-ს, კანადას და მექსიკას შორის თავისუფალი ვაჭრობის ზონის აქტუალიზაციაზე.
გასულ კვირას დონალდ ტრამპმა ღიად გააკრიტიკა კანადას პრემიერ-მინისტრი და ის აშშ-ს წინააღმდეგ უსამართლო სავაჭრო ბარიერების შექმნაში დაადანაშაულა.
როგორც ტელეარხი CTV იუწყება, სოციალურ ქსელებში კანადელებმა ჰეშთეგის #BuyCanadian (იყიდე კანადური), #BoycottUSProducts (ბოიკოტი გამოუცხადე ამერიკულ პროდუქციას) გამოყენება დაიწყეს.
„ბოლო რამდენიმე დღის განმავლობაში ჩვენ ვხედავთ, რომ პატრიოტული განწყობები გაძლიერდა“, - აღნიშნა კანადის პრემიერ-მინისტრმა.