ზურაბ პატარაძემ ჭოროხის შემოვლითი გზის სამშენებლო სამუშაოები დაათვალიერა

აჭარის მთავრობის თავმჯდომარემ ზურაბ პატარაძემ ჭოროხის შემოვლითი გზის სამშენებლო სამუშაოები დაათვალიერა. როგორც „ინტერპრესნიუსს“ აჭარის ა/რ მთავრობის პრესსამსახურიდან აცნობეს, გონიოს ხიდიდან მახოს ხიდამდე ახალი შემოვლითი გზის მშენებლობა დასრულების ეტაპზეა.

“აჭარაში მიმდინარე საგაზო ინფრასტრუქტურის მიმართულებით, ეს არის ერთ-ერთი უმნიშვნელოვანესი პროექტი, რომელიც სარფისკენ მიმავალ ცენტრალურ გზას განტვირთავს და ხელს შეუწყობს მაღალმთიანი აჭარის ტურიზმის განვითარებას“, - ასე აფასებს აჭარის მთავრობის თავმჯდომარე ზურაბ პატარაძე ჭოროხის შემოვლითი გზის მშენებლობას.

ჭოროხის შემოვლითი საავტომობილო გზის მე-2 ეტაპის ფარგლებში უკვე დასრულდა გზის 3500 მეტრამდე მონაკვეთის მშენებლობა. სამეტაპიანი პროექტი 5 700 მეტრი სიგრძის მონაკვეთს მოიცავს და მისი სრული ღირებულება 8 253 000 ლარს შეადგენს.

როგორც აჭარის მთავრობის თავმჯდომარე აცხადებს, რეგიონში მზარდი ტურიზმისა და ეკონომიკის პირობებში, მნიშვნელოვანია ახალი ინფრასტრუქტურის შექმნა, რასაც საქართველოს ინფრასტრუქტურისა და რეგიონული განვითარების სამინისტროსთან ერთად აჭარის საგზაო დეპარტამენტი ეტაპობრივად ახორციელებს.

„ტურისტული ნაკადის ზრდასთან ერთად საჭიროა ინფრასტრუქტურის განვითარება. შესაბამისად, ამ მიმართულებით აჭარაში მართლაც ისტორიული და უმნიშვნელოვანესი პროექტები ხორციელდება. ჭოროხის საავტომობილო გზის გარდა, აქტიურ ფაზაშია ესტაკადის მშენებლობა, ივნისის ბოლომდე გაიხსნება ქობულეთის შემოვლითი გზა, სულ მალე კი დაიწყება ბათუმის შემოვლითი გზის მშენებლობაც“, - აღნიშნა ზურაბ პატარაძემ.

აჭარის მთავრობის თავმჯდომარემ ჭოროხის შემოვლითი გზის მეორე ეტაპის სამუშაოები აჭარის ფინანსთა და ეკონომიკის მინისტრ რამაზ ბოლქვაძესთან და აჭარის საგზაო დეპარტამენტის უფროს არჩილ ჩიქოვანთან ერთად დაათვალიერა.