კოლეგებს მოგმართავთ, როცა გადაწყვეტთ ვინმეს სისხლიანი 9 წელი გაახსენოთ, არ დაგავიწყდეთ თქვენი პრემიერ - მინისტრობის კანდიდატი, რომელმაც „ნაციონალურ მოძრაობას“ თანხა შესწირა, - ამის შესახებ ფრაქცია „ნაციონალური მოძრაობის“ წევრმა ლევან ხაბეიშვილმა საკრებულოს დღევანდელ სხდომაზე განაცხადა, როდესაც პრემიერ - მინისტრის პოსტზე მამუკა ბახტაძის წარდგენის საკითხს გამოეხმაურა.
სხდომაზე დეპუტატებს შორის კამათი საბიუჯეტო ცვლილებების განხილვას მოჰყვა.
„ჩემი კოლეგები ვიდრე მგზნებარედ გადაწყვეტთ ხოლმე სისხლიანი 9 წელი შეგვახსენოთ, მაშინ იქვე არ დაგავიწყდეთ, რომ იმ “სისხლიანი” რეჟიმის დამფინანსებელი გახლდათ ახლა უკვე თქვენი პრემიერ- მინისტრობის კანდიდატი. მე მოვისმინე მერის განცხადება. ითქვა, რომ თითქოს ვიღაცამ შეაშინა ან დააშინა. ამას გამართლება არ აქვს. თუ შეაშინეს, შეშინებული პრემიერ - მინისტრი არავის არ სჭირდება და თუ აიძულეს, მაშინ საქმის წარმოება უნდა დაწყებულიყო მას შემდეგ, რაც ხელისუფლება შეიცვალა და ვინც აიძულა, ის ადამიანები დასჯილები უნდა იყვნენ", - განაცხადა ხაბეიშვილმა.