ისრაელის პრემიერ-მინისტრის ბენიამინ ნეთანიაჰუს განცხადებით, მან რუსეთის პრეზიდენტს ვლადიმერ პუტინსა და აშშ-ს სახელმწიფო მდივანს მაიკლ პომპეოს შეატყობინა, რომ ისრაელი ზომებს მიიღებს, რათა სირიაში ირანის სამხედრო ყოფნა არ დაუშვას.
ამის შესახებ ბენიამინ ნეთანიაჰუმ ისრაელის მინისტრთა კაბინეტის დღევანდელ სხდომაზე განაცხადა.
„ამ კვირის ბოლოს რუსეთის პრეზიდენტსა და აშშ-ს სახელმწიფო მდივანს ვესაუბრე. მე გავუმეორე მათ ჩვენი ძირითადი პრინციპები სირიასთან მიმართებაში. პირველ რიგში, ირანმა უნდა დატოვოს სირია; მეორე, ჩვენ ზომებს მივიღებთ ისრაელის საზღვართან ირანის სამხედრო ყოფნის გაძლიერებასთან დაკავშირებით. ჩვენ ამას სირიის ნებისმიერ წერტილში შევეწინააღმდეგებით“, - განაცხადა ბენიამინ ნეთანიაჰუმ.
აღსანიშნავია, პარასკევს კრემლის პრესსამსახურმა ინფორმაცია გაავრცელა, რომ პუტინმა და ნეთანიაჰუმ სატელეფონო საუბრისას სირია-ისრაელის საზღვართან უსაფრთხოების უზრუნველყოფის კუთხით არსებული საკითხი განიხილეს.