ყაზახეთში მატარებლის რელსებიდან გადავარდნას მოზარდი ემსხვერპლა

მატარებელი, რომელიც ასტანა-ალმა-ათას რეისს ასრულებდა, ყაზახეთის ჟამბილის რაიონში რელსებიდან გადავარდა, რასაც მსხვერპლი მოყვა. ქვეყნის გენერალური პროკურატურის ინფორმაციით, დაღუპულია ერთი მოზარდი, სამმა ადამიანმა სხვადასხვა სიმძიმის ტრავმა მიიღო. დახმარებისთვის სამედიცინო დაწესებულებებს კიდევ 11-მა ადამიანმა მიმართა.

რელსებიდან ექვსი ვაგონი გადავრდა. მომხდარზე დაწყებულია გამოძიება, რომელზე ზედამხედველობასაც ქვეყნის ტრანსპორტის პროკურატურა განახორციელებს.

ტრანსპორტის სამინისტროს ინფორმაციით, მომხდარის მიზეზი, შესაძლოა, გამრუდებული რელსი ყოფილიყო, რომლის დანახვისთანავე მემანქანემ ექსტრემალური დამუხრუჭება განახორციელა.