დღეს, თბილისში საერთაშორისო სომელიეთა ასოციაციის გენერალურმა ასამბლეამ მუშაობა დაიწყო. ამის შესახებ „ინტერპრესნიუსს“ სსიპ ღვინის ეროვნული სააგენტოდან აცნობეს.
მათივე ინფორმაციით, საქართველოს სომელიეთა ასოციაციისა და სსიპ ღვინის ეროვნული სააგენტოს ორგანიზებით, საქართველოში პირველად იმართება საერთაშორისო სომელიეთა ასოციაციის (Association de la Sommellerie Internationale, A.S.I.) 49-ე ყოველწლიური გენერალური ასამბლეა.
გენერალური ასამბლეის სამუშაო სესია საქართველოს სომელიეთა ასოციაციის პრეზიდენტმა შალვა ხეცურიანმა გახსნა.
მათივე ცნობით, გენერალური ასამბლეის დღეებში, 18-22 ივნისს, იგეგმება რამდენიმე მნიშვნელოვანი ღონისძიება: საფერავის ძირითადი მახასიათებლების დადგენის საერთაშორისო სესია, საუკეთესო ქვევრის ღვინოების თემატური დეგუსტაცია, მასტერ-კლასი ქართულ ღვინოზე, პროფესიული დეგუსტაცია “სრულიად საქართველოს საუკეთესო ღვინოები ერთ სივრცეში” და ასევე გაიმართება ნანა ჯორჯაძის ფილმის “ღვინის ნულოვანი მერიდიანი” ეროვნული პრემიერა.
2018 წლის გენერალური ასამბლეის ჩატარების უფლება საქართველოს სომელიეთა ასოციაციამ მოიპოვა. აღნიშნული ღონისძიება მიზნად ისახავს ასამბლეის მაღალი რანგის სტუმრებს მაქსიმალურად კარგად გააცნოს ქართული ღვინო, ქართული ღვინის კულტურა და ტრადიციები.
საერთაშორისო სომელიეთა ასოციაცია 1969 წელს საფრანგეთში დაარსდა და აერთიანებს მსოფლიოს 62 ქვეყნის სომელიეთა ეროვნულ ასოციაციებს. საქართველოს სომელიეთა ასოციაცია მათ რიცხვს 2014 წელს შეუერთდა. ყოველწლიურად საერთაშორისო სომელიეთა ასოციაცია მართავს გენერალურ ასამბლეას, სადაც იკრიბებიან წევრი ქვეყნების სომელიეთა ასოციაციების პრეზიდენტები, ღვინის ჟურნალისტები, ბაიერები და ღვინის სფეროს სხვა გავლენიანი პირები.