დუშეთის მუნიციპალიტეტის მჭადიჯვრის ადმინისტრაციული ერთეულის, სოფელ მჭადიჯვარში ჭაბურღილის მოწყობა დასრულდა.

როგორც „ინტერპრესნიუსს“ დუშეთის მუნიციპალიტეტიდან აცნობეს, პროექტის ფარგლებში, გაკეთდა 32 საუბნო ონკანი, რომლითაც უზრუნველყოფილი იქნება 450-მდე ოჯახის წყალმომარაგება. სასმელი წყლის პრობლემა სოფელ მჭადიჯვრის მოსახლეობას წლების განმავლობაში აწუხდებდა, საკითხის გადაწყვეტა მათ დუშეთის მუნიციპალიტეტის მერს ზურაბ სეხნიაშვილს ერთ–ერთი შეხვედრისას სთხოვეს.

ადგილობრივმა ხელისუფლებამ სოფლის წყალმომარაგების უზრუნველსაყოფად საჭირო ინფრასტრუქტურული პროექტი მცხეთა-მთიანეთის სახელმწიფო რწმუნებულის-გუბერნატორის ლევან ზაუტაშვილისა და დუშეთის, თიანეთისა და ყაზბეგის გაერთიანებული ოლქის დეპუტატის ზაქარია ქუცნაშვილს ხელშეწყობითა და დახმარებით შეიმუშავა და განახორციელა.

მუნიციპალიტეტის განცხადებით, დასრულებული სამუშაოები დუშეთის მუნიციპალიტეტის მერმა ზურაბ სეხნიაშვილმა, მოადგილესთან ზაქარია ხეხელაშვილთან ერთად დაათვალიერა და მოსახლეობის აზრს გაეცნო. ადგილობრივები განხორციელებული სამუშაოებითა და შედეგით კმაყოფილნი არიან.