დაახლოებით ივლისის დასაწყისიდან, დევნილებს ნებისმიერი სერვისის მიღება იუსტიციის სახლებში შეეძლებათ, - ამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრობის კანდიდატმა სოზარ სუბარმა პარლამენტში რამდენიმე კომიტეტის გაერთიანებულ სხდომაზე განაცხადა, სადაც მინისტრობის კანდიდატებს უსმენენ.

მინისტრობის კანდიდატმა ასევე იმ ელექტრონულ პროგრამაზე ისაუბრა, რომელიც დევნილებისთვის შეიქმნა.

„გაკეთდა ელექტრონული პროგრამა. 30 442 განაცხადია ასახული ელექტრონულ მოდულში, შესაბამისად, თითოეულ დევნილს შეუძლია თვითონ ნახოს თავის შესახებ მონაცემები სამინისტროში მიუსვლელად და ცხელ ხაზზე დარეკვის გარეშე. ასევე, ნახოს როდის შეიძლება ჰქონდეს ბინის მოლოდინი. ნებისმიერ მის განცხადებაზე პასუხი შეუძლია იხილოს ელექტრონულად სახლიდან გაუსვლელად. დაახლოებით ივლისის დასაწყისში, ჩვენი პროგრამების ინტეგრირება გვექნება უკვე იუსტიციის სამინისტროს სოციალურ სახლებთან. ნებისმიერ დევნილს იუსტიციის სახლებში შეეძლება განაცხადის შევსება ბინის თაობაზე, ასევე, ნებისმიერი სერვისის მიღება, რომელსაც ახლა სამინისტროში ან რეგიონულ სამმართველოებში იღებს“, - განაცხადა სუბარმა.