გიორგი გახარია - შსს ქვეყნის მართლწესრიგის ხერხემალია

შსს ქვეყნის მართლწესრიგის ხერხემალია, - ამის შესახებ შინაგან საქმეთა მინისტრობის კანდიდატმა, გიორგი გახარიამ პარლამენტში, რამდენიმე კომიტეტის გაერთიანებულ სხდომაზე განაცხადა, სადაც მინისტრობის კანდიდატები დეპუტატებს სამთავრობო პროგრამას აცნობენ.

გახარიამ ეფექტური საკანონმდებლო ცვლილებებისთვის პარლამენტს მადლობა გადაუხადა. მინისტრობის კანდიდატის თქმით, უწყებას კიდევ აქვს მომზადებული ცვლილებების დიდი გეგმა და მას უახლოეს მომავალში წარადგენს.

“ჩვენ ძალიან კარგად გვესმის, რომ შინაგან საქმეთა სამინისტრო დღეს ქვეყანაში ფაქტობრივად მართლწესრიგის ხერხემალია. ეფექტიანი, სამართლიანი და ამავდროულად პოლიტიკურად ნეიტრალური შინაგან საქმეთა სამინისტრო და პოლიცია არის ამ ქვეყნის უდიდესი მონაპოვარი, რომელსაც ჭირდება განვითარება და რომლისთვისაც ვართ მზად. პარლამენტარებს მინდა ძალიან დიდი მადლობა გადაგიხადოთ. თქვენ ყველაზე კარგად იცით რამხელა პროგრესია საკანონმდებლო ჩარჩოს განვითარებაში. თქვენი დახმარებით მოხდა „ქურდული სამყაროს“ კონტექსტში იმ საკანონმდებლო ცვლილებების შეტანა, რომელიც უკვე განხორციელებულია და კიდევ ბევრი სხვა. ასეთი საკანონმდებლო ცვლილებების დიდი გეგმა გვაქვს ჩვენ და უახლოეს მომავალში ამას წარმოგიდგენთ. დარწმუნებული ვარ, ერთობლივი მუშაობით შევძლებთ უფრო ეფექტიანი და სამართლიანი გავხადოთ ჩვენი პოლიცია“, - განაცხადა გიორგი გახარიამ.