სასჯელაღსრულებისა და პრობაციის სამინისტრო პენიტენციურ დაწესებულებაში შემსვლელთა შემოწმების სამსახურს ქმნის. ამის შესახებ სასჯელაღსრულებისა და პრობაციის მინისტრობის კანდიდატმა კახა კახიშვილმა, პარლამენტში რამდენიმე კომიტეტის გაერთიანებულს სხდომაზე განაცხადა, სადაც მინისტრობის კანდიდატებს უსმენდნენ. მინისტრობის კანდიდატის თქმით, უკვე შექმნილია შესაბამისი სამმართველო, რომელიც სწავლებას გაივლის აეროპორტის უსაფრთხოების დეპარტამენტში.

„სამწუხაროდ, წლების მანძილზე ციხეებში არ იყო მიმსვლელთა შემოწმების სამსახურები. ამიტომ ჩვენ ჩამოვაყალიბეთ უკვე მთავარი სამმართველო, რომელიც სწავლებას გაივლის აეროპორტის უსაფრთხოების დეპარტამენტში, სადაც არიან ის ადამიანები, რომლებიც ამოწმებენ რეისზე მისულ ადამიანებს და ასეთი ტიპის პროგრამით განვახორციელებთ ციხეებში შემსვლელი ადამიანების კონტროლს, რათა აკრძალული ნივთები არ იყოს შეტანილი პენიტენციურ დაწესებულებებში“, - განაცხადა კახა კახიშვილმა.