ახალგაზრდა მორაგბეებს მინდა მადლობა გადავუხადო იმ მაგარი შემართებისთვის, რაც აჩვენეს, - ამის შესახებ საპარლამენტო უმრავლესობის სხდომაზე საქართველოს პრემიერ-მინისტრობის კანდიდატმა, მამუკა ბახტაძემ სამთავრობო პროგრამის „თავისუფლება, სწრაფი განვითარება, კეთილდღეობა“ წარდგენისას განაცხადა.
მამუკა ბახტაძემ საზოგადოებაში სპორტისა და კულტურის როლზეც ისაუბრა.
„ახალგაზრდა მორაგბეებს მინდა მადლობა გადავუხადო იმ მაგარი შემართებისთვის, რაც აჩვენეს. მინდა მათ ვუსურვო წარმატებები. მე მინდა მივმართო საზოგადოების მნიშვნელოვან ნაწილს, სპორტის საზოგადოებას, რომ მათი ადგილი და როლი არის მნიშვნელოვანი ჩვენ საზოგადოებაში.
ჩვენ აქტიურად ვიმუშავებთ და ეს იქნება ჩვენი ერთ-ერთი მთავარი მიზანი, რომ საქართველოში გავაძლიეროთ ადამიანური კაპიტალი - განათლების, კულტურული და სპორტული ცხოვრების წახალისებით და გაძლიერებით“, - განაცხადა მამუკა ბახტაძემ.
ქართველმა 20 წლამდელმა მორაგბეებმა ისტორიაში პირველად მსოფლიო ჩემპიონატზე სამი მატჩი მოიგეს, ასევე 6 ერის ორ ქვეყანას მოუგეს და პირველად მე-9 ადგილი დაიკავეს. გარდა ამისა, უმცროსი „ბორჯღალოსნები" პირველი გუნდია, რომელიც ქვემო დივიზიონიდან ამოსვლის შემდეგ ზედიზედ სამჯერ დარჩა ელიტაში.