არ ვაპირებ დავიწყო ჩამოთვლა იმ პროექტების, რომელიც განხორციელებული აქვს ბატონ ბიძინა ივანიშვილს საქართველოში, მოსახლეობამ ეს ყველაფერი ძალიან კარგად იცის, - ამის შესახებ პრემიერ-მინისტრობის კანდიდატმა, მამუკა ბახტაძემ ფრაქცია “ნაციონალურ მოძრაობასთან“ შეხვედრისას განაცხადა.

მისივე თქმით, “ნაციონალური მოძრაობის“ წევრი თინა ბოკუჩავა ივანიშვილთან დაკავშირებით პოლიტიკურ განცხადებებს აკეთებს და მას საზოგადოება ობიექტურად შეაფასებს.

“რაც შეეხება იმას, რომ ბიძინა ივანიშვილს არაფერი დაუფინანსებია, ქალბატონო თინა, მე ნამდვილად არ ვაპირებ ახლა დავიწყო ჩამოთვლა იმ პროექტების, რომელიც განხორციელებული აქვს ბატონ ბიძინა ივანიშვილს საქართველოში, დაწყებული კულტურის და სპორტის ობიექტებით და დასრულებული ძეგლების აღდგენით. ვფიქრობ, მოსახლეობამ ეს ყველაფერი ძალიან კარგად იცის და ვფიქრობ, ეს არ არის ის თემა, რომელიც დღეს აინტერესებს საზოგადოებას, რომ თურმე ბიძინა ივანიშვილს ქართული საზოგადოებისთვის არაფერი გაუკეთებია. ეს არის თქვენი პოლიტიკური განცხადება და ვფიქრობ, ქართული საზოგადოება მას ობიექტურად შეაფასებს“, - განაცხადა მამუკა ბახტაძემ.