სისტემის ერთმა ნაწილმა ამ შემთხვევაში ბოლომდე ვერ გააკეთა ის, რასაც საზოგადოება მისგან ელოდა, - ასე ეხმაურება პრემიერ-მინისტრობის კანდიდატი მამუკა ბახტაძე ხორავას ქუჩაზე მომხდარი მკვლელობის გამოძიების ირგვლივ მიმდინარე მოვლენებს. მისივე თქმით, გამოძიებამ უნდა დაადგინოს, რა იყო შეცდომა და რა - არა.

“ეს არის მართლა უზარმაზარი ტრაგედია და სრულ სოლიდარობას ვუცხადებ გარდაცვლილი ახალგაზრდების ოჯახებს. როდესაც ჩვენ გვაქვს სიტუაცია, რომ დგება რაღაცა სტატუს კვო და ამ შემთხვევაში საზოგადოება არ არის დარწმუნებული იმაში, რომ ეს არის ის შედეგი, რომელიც იქნებოდა მართებული, რა თქმა უნდა, ამ შემთხვევაში ჩვენ შეიძლება ვთქვათ, რომ სისტემის ერთმა ნაწილმა ამ შემთხვევაში ბოლომდე ვერ გააკეთა ის, რასაც საზოგადოება მისგან ელოდა. როდესაც ჩვენ ვსაუბრობთ შეცდომებზე, აქ არის ძალიან მნიშვნელოვანი მომენტი. სისტემისთვის ყველაზე დიდი პრობლემა არის ის, რომ როცა რაღაც მოხდება, როგორი ჯანსაღი რეაქცია ექნება მას ამ პრობლემაზე. ჩვენმა საზოგადოებამ ნათლად დაინახა, თუ როგორი უზენაესი ფასეულობა არის პოლიტიკური გუნდისთვის ეს და საქართველოს პარლამენტში, შეიქმნა მნიშვნელოვანი პრეცედენტი იმისა, რომ ასეთი მნიშვნელოვანი პროტესტის ფონზე, როგორ უნდა რეაგირებდეს სახელმწიფო ასეთ შემთხვევებზე. ვამბობ იმას, რომ ის, რაც დადგა, არ იყო საზოგადოების ინტერესი, გამოძიებამ უნდა დაადგინოს, რა იყო შეცდომა და რა არა, მაგრამ სისტემური თვალსაზრისით, როცა პოლიტიკური სისტემა აკეთებს ასეთ რეაგირებას, ეს ნიშნავს, რომ ეს არის ძალიან მაღალი ფასეულობების მატარებელი სისტემა“, - განაცხადა მამუკა ბახტაძემ.