ბელგიის ქალაქ ანტვერპენის პორტის საბაჟო სამსახურმა ირანიდან ჩასული ერთ-ერთი გემის შემოწმებისას 1 ტონამდე ჰეროინი აღმოაჩინა. ამის შესახებ ქალაქის პროკურატურის წარმომადგენელმა კენ ვიტპასმა განაცხადა.

„ერთ-ერთი კონტეინერის კომპიუტერული ტომოგრაფიის შედეგად აღმოვაჩინეთ 57 ტომარა, რომლებშიც საერთო ჯამში 954 კილოგრამი ჰეროინი იყო“, - განაცხადა ვიტპასმა.

მისივე თქმით, ეს ანტვერპენის პორტში დაფიქსირებული ჰეროინის ერთ-ერთი ყველაზე დიდი პარტიაა, მისი ღირებულება კი დაახლოებით 55 მილიონ ევროს შეადგენს.

გამოძიების ფარგლებში დაკავებულია ორი ეჭვმიტანილი.