მამუკა ბახტაძე - აღებული საგარეო ვალი ხმარდება მხოლოდ ინფრასტრუქტურულ პროექტებს, რომლებმაც უნდა შექმნას დამატებითი სამუშაო ადგილები და უზრუნველყოს ეკონომიკის დაჩქარებული ზრდა

აღებული საგარეო ვალი ხმარდება მხოლოდ ინფრასტრუქტურულ პროექტებს, რომლებმაც უნდა შექმნას დამატებითი სამუშაო ადგილები და უზრუნველყოს ეკონომიკის დაჩქარებული ზრდა, - ამის შესახებ პრემიერობის კანდიდატმა მამუკა ბახტაძემ პარლამენტში „ევროპული საქართველოს“ დეპუტატის ზურაბ ჭიაბერაშვილის საპასუხოდ განაცხადა.

„რაც შეეხება სამთავრობო ვალს, ჩვენ ამ პარამეტრს ვაკონტროლებთ ძალიან პრინციპულ რეჟიმში და ის პირველი კვარტლის ბოლოსთვის არის დაახლოებით 42%. თქვენ თუ წაიკითხეთ ჩვენი პროგრამა, იქ მოცემულია ძალიან მნიშვნელოვანი შეფასების ინდიკატორი - ჩვენ განვახორციელებთ ყველა რეფორმას, რომელიც საშუალებას მოგვცემს, გავზარდოთ ჩვენი ქვეყნის საკრედიტო რეიტინგი. და არ განვახორციელებთ არც ერთ რეფორმას, რომელმაც შეიძლება ის დააზიანოს. ეს არის ჩვენი მიდგომა. აქედან გამომდიანრე, ჩვენ ნაბიჯ-ნაბიჯ უნდა შევამციროთ ეს პარამეტრი - 42% და ჩამოვწიოთ 6-7 პუნქტით. ამავდროულად, უნდა გავითვალისწინოთ ისიც, რომ ის ვალი, რომლის აღებაც ხდება, ხმარდება მხოლოდ ინფრასტრუქტურულ პროექტებს, რომლებმაც უნდა შექმნას დამატებითი სამუშაო ადგილები და უზრუნველყოს ეკონომიკის დაჩქარებული ზრდა. რა თქმა უნდა, ერთი ლარი არ უნდა მიდიოდეს ამ შემთხვევაში მიმდინარე ხარჯებზე და გარწმუნებთ, რომ ეს ასეა“,-განაცხადა მამუკა ბახტაძემ.