ჩვენ პრემიერ-მინისტრმა დაგვიდასტურა, რომ მთავრობაში დაგეგმილი სტრუქტურული რეორგანიზაცია ადამიანური რესურსის შემცირებას არ ნიშნავს, - ამის შესახებ ჟურნალისტებს „ქართული ოცნების“ დეპუტატმა ეკა ბესელიამ განუცხადა.

მისივე განმარტებით, იმ პრიორიტეტების რეალიზებას, რაც სამინისტროებს გააჩნია, ადამიანურად ის რესურსი სჭირდება, რაც ჰყავს.

დეპუტატის ინფორმაციით, ის, თუ რის ხარჯზე მოხდება თანხების დაზოგვა, ამას მთავრობა უახლოეს პერიოდში წარმოადგენს.

„სამთავრობო სტრუქტურების რეორგანიზაციის თაობაზე კონცეპტუალური ხედვა მხარდაჭერილია. პრემიერ-მინისტრის ხედვაა, რომ უფრო მცირე ზომის და უფრო ნაკლები სამინისტროების პირობებში, მართვა უფრო ეფექტური იქნება. ჩვენ ამაზე შევთანხმდით და ნდობის მანდატი ამ მანდატსაც მოიაზრებს. კონკრეტულ გადაწყვეტილებებზე კონსულტაციები ამ დღეებში დაიწყება“, - განუცხადა ჟურნალისტებს ეკა ბესელიამ.