ხაშურის ბიბლიოთეკაში ევროატლანტიკურ სტრუქტურებში ინტეგრაციის შესახებ შეხვედრა გაიმართა. როგორც „ინტერპრესნიუსს“ ხაშურის მუნიციპალიტეტიდან აცნობეს, ბიბლიოთეკის ამერიკულ კუთხეში ნატოსა და ევროკავშირის შესახებ მსჯელობდნენ.

„მითები ევროკავშირისა და ნატოს შესახებ“, - ამ სახელწოდების პრეზენტაცია წარუდგინა აუდიტორიას მუნიციპალიტეტის მერიის საზოგადოებასთან ურთიერთობის და საინფორმაციო განყოფილების უფროსმა ნინო სუხიაშვილმა.

შეხვედრას ესწრებოდნენ სსიპ „ნატოსა და ევროკავშირის შესახებ საინფორმაციო ცენტრის“ წარმომადგენელი შიდა ქართლში მარიამ გიგაური, ხაშურის მუნიციპალიტეტის მერის მოადგილე ზურაბ ჩხიტუნიძე, ამერიკული კუთხის კოორდინატორი ქეთევან მეტრეველი, მერიის წარმომადგენლები, ახალგაზრდები, დაინტერესებული პირები.

„გაიმართა საინტერესო დისკუსია. შეხვედრის მონაწილეებმა იმსჯელეს იმ პოზიტიური შედეგების შესახებ, რაც ევროატლანტიკურ სტრუქტურებში ინტეგრაციას და ინტეგრაციის მიმართულებით განხორციელებულ ძალისხმევას ახლავს თან.

მხარეები შეთანხმდნენ, რომ მსგავსი შეხვედრები მომავალში, უკვე მუნიციპალიტეტის სოფლებში გაიმართება“, - ნათქვამია ინფორმაციაში.