საერო, საჯარო საკითხებზე გადაწყვეტილებები უნდა მიიღონ სახელმწიფო დაწესებულებებმა და სტრუქტურებმა. ეკლესიის პოზიცია გადაწყვეტილების მიღებისთვის უნდა იყოს მნიშვნელოვანი, მაგრამ ერთ-ერთი პოზიცია, - ამის შესახებ "შენების მოძრაობის" ლიდერმა დავით უსუფაშვილმა სინოდის კრების ოქმთან და ნარკოპოლიტიკასთან დაკავშირებული კითხვის პასუხად განაცხადა.

"არ მიკვირს, რომ ეკლესიის პოზიცია ბევრ საკითხთან დაკავშირებით, მათ შორის ნარკოტიკების მოხმარებასთან დაკავშირებით, არის ულტრაკონსერვატორული და არა ულტრალიბერალური, ამიტომ ყველამ ყურადღებით უნდა მოვისმინოთ ეს მოსაზრება, მაგრამ საერო, საჯარო საკითხებში გადაწყვეტილებები უნდა მიიღონ სახელმწიფო დაწესებულებებმა და სტრუქტურებმა. მათთვის ეკლესიის პოზიცია გადაწყვეტილების მიღებისთვის უნდა იყოს მნიშვნელოვანი, მაგრამ ერთ-ერთი პოზიცია. ამავე პოზიციაზე არის ბევრი ჩვენი მოქალაქე, რომ მომხმარებლის არადამნაშავედ ცნობა გამოიწვევს ნარკოტიკების მოხმარების გაძლიერებას. მე მგონია და მსოფლიო პრაქტიკა ადასტურებს, რომ ნარკოტიკის მომხმარებლის დამნაშავედ გამოცხადებით ჩვენ ვერც ნარკოტიკის მომხმარებელთა რაოდენობას ვამცირებთ და ვერც ადამიანების გამოსწორებას ვუწყობთ ხელს. მე არ ვარ ლეგალიზაციის მომხრე, მე ვარ მომხრე მოხმარების დეკრიმინალიზაციის", - განაცხადა დავით უსუფაშვილმა.

კითხვაზე: ახდენს თუ არა ეკლესია გავლენას სახელმწიფო გადაწყვეტილებებზე, უსუფაშვილმა აღნიშნა, რომ არ ახსენდება, საპატრიარქოს ხელისუფლებაზე ძალა ეხმარა გადაწყვეტილების მიღების დროს.

"არ მახსენდება შემთხვევა, როდესაც საპატრიარქოს ძალა ეხმარა ხელისუფლებაზე რაიმე გადაწყვეტილების მიღების ან არმიღების დროს. ხელისუფლებაში ჩვენ გვჭირდება ისეთი ადამიანები, ისეთი მყარი ხერხემლის მქონე ადამიანები, რომლებიც ყველა არგუმენტს მოისმენენ ყველა მხრიდან - ჩრდილოეთიდან, სამხრეთიდან, ეკლესიიდან, ახალგაზრდობიდან და აიღებენ პასუხისმგებლობას და მიიღებენ გადაწყვეტილებას. მე რასაც ვაკვირდები, ძალიან ბევრი პოლიტიკური ლიდერი და სახელმწიფო მოხელე, ეს მარტო "ქართული ოცნების" პრობლემა არაა, ამოეფარება ხოლმე ეკლესიის ავტორიტეტს - თუ გევალება გადაწყვეტილების მიღება, უნდა მიიღო და აგო პასუხი",- განაცხადა უსუფაშვილმა.

წმინდა სინოდის აზრით, კანაფის დამზადების ნებართვა ფაქტობრივად, ნარკოვაჭრობის ლეგალიზებაა, რაც ქვეყანას უმძიმეს შედეგებს მოუტანს.