ეკონომიკის სამინისტრო პერიოდული ტექნიკური ინსპექტირების რეფორმის დეტალებზე საზოგადოებას ინფორმაციას კიდევ ერთხელ აცნობს

საქართველოს ეკონომიკისა და მდგრადი განვითარების სამინისტრო პერიოდული ტექნიკური ინსპექტირების რეფორმის დეტალებს საზოგადოებას განცხადებით კიდევ ერთხელ ახსენებს.

„როგორ შევამოწმოთ, აქვს თუ არა ავტოსატრანსპორტო საშუალებას პერიოდული ტექნიკური ინსპექტირება გავლილი? საქართველოში სავალდებულო პერიოდული ტექნიკური ინსპექტირება, ახალი სტანდარტების შესაბამისად, 2018 წლის იანვრიდან მოქმედებს. ყველა ავტოსატრანსპორტო საშუალებისთვის პერიოდული ტექნიკური ინსპექტირების სრულად ამოქმედებისთვის დაწესდა გარკვეული გარდამავალი პერიოდი და პროცესი გადანაწილდა 2 წელზე.

პერიოდული ტექნიკური ინსპექტირების რეფორმის ფარგლებში, 2018 წლის 1 იანვრიდან სავალდებულო პერიოდული ტექნიკური ინსპექტირება, ევროკავშირის სტანდარტების შესაბამისად, უკვე ამოქმედდა საქართველოში რეგისტრირებული სატვირთო და 8 ადგილზე მეტი (მძღოლის გარდა) დასაჯდომი ადგილის მქონე სამგზავრო ავტოსატრანსპორტო საშუალებებისთვის (M2, M3, N2, N3 კატეგორიები) და ასევე მათი მისაბმელებისთვის (O3, O4 კატეგორია).

დარჩენილი კატეგორიის ავტომობილებისთვის პერიოდული ტექნიკური ინსპექტირება ამოქმედდება შემდეგი თანმიმდევრობით: 2018 წლის 1 ივლისიდან - M1 (მსუბუქი), სახელმწიფო უწყებების და იურიდიული პირების კუთვნილი ავტომობილები;

2018 წლის 1 ოქტომბრიდან - M1 (მსუბუქი), 3000 კუბურ სანტიმეტრის ან მეტი ძრავის მუშა მოცულობის მქონე ავტომობილები;

2019 წლის 1 იანვრიდან - M1 (მსუბუქი), საქართველოში რეგისტრირებული ყველა ავტომობილი.

ინფორმაციას იმის შესახებ, აქვს თუ არა კონკრეტულ ავტოსატრანსპორტო საშუალებას გავლილი პერიოდული ტექნიკური ინსპექტირება, ნებისმიერი მოქალაქე შეძლებს, შეიტყოს ცხელ ხაზზე 1484 და ოპერატორს მიაწოდოს კონკრეტული ავტოსატრანსპორტო საშუალების სახელმწიფო ნომერი, რომელიც სპეციალურ მონაცემთა ბაზაში გადამოწმდება. შედეგად, მოქალაქე მიიღებს ინფორმაციას, აქვს თუ არა გავლილი კონკრეტულ ავტომობილს ტექნიკური ინსპექტირება.

პერიოდული ტექნიკური ინსპექტირების რეფორმას საქართველოს ეკონომიკისა და მდგრადი განვითარების სამინისტრო სხვა სამთავრობო უწყებებთან ერთად ახორციელებს. რეფორმის იმპლემენტაციის პროცესში ეკონომიკისა და მდგრადი განვითარების სამინისტროს საკონსულტაციო მომსახურებას შვეიცარული საკონსულტაციო კომპანია „SGS - Societe Generale de Surveillance SA“ უწევს.

ინსპექტირების გავლას საქართველოში რეგისტრირებული (ქართული ნომრების მქონე) ყველა ავტოსატრანსპორტო საშუალება დაექვემდებარება. აღნიშნული რეფორმა შესაბამისობაშია საქართველოსა და ევროკავშირს შორის ასოცირების შესახებ შეთანხმებასთან, რომლის მიხედვით, საქართველოს მთავრობის დადგენილების თანახმად, განისაზღვრა ავტოსატრანსპორტო საშუალების პერიოდული ტექნიკური ინსპექტირების ერთიანი ორგანიზაციულ-ტექნიკური და ნორმატიული ბაზა“, – ნათქვამია სამინისტროს მიერ გავრცელებულ განცხადებაში.

ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს